Friday, April 18, 2014

شرهة وعتب

أصعب شي بالدنيا، لما نحدد أفعالنا على حسب الشخص إلي بنتعامل وياه!
أحياناً يكون ودنا نسأل.. نهتم.. ودنا نتطمن..
و بنفس اللحظة إلي ودنا نهتم و نسأل فيها تطري على بالنا أفكار مو حلوة.. نتذكر فلانة شلون ردت علينا آخر مرة سألنا عنها، و نتذكر إلي حقرت يوم يينا بنتطمن عليها، و نتذكر إلي دقينا سألنا عنها و قامت تعاتب تشره و أساساً اهيا إلي ما كلفت نفسها تسأل..
هالأفكار تخلينا (نكعّ بريك) مثل ما يقولون..
أوقات كثييييرة معاملة الناس بتربيتنا تكون صعبة بس هالشي مو منّا، في ناس يحدّونج تنزرينهم، و يحدونج تدقرينهم و هم بعد يحدونج تلومينهم!
أول ما تقوليلهم كلمة حلوة قطوا عليج نقزة كبر إبليس، إنزين ليش؟ مو الأفضل إنج تشوفين شلون انتي عاملتيني قبل؟.. مو عشان شي، بس عشان ما تخلين الناس يبعدون عنج بس !
ما أحب ألوم أحد، ولا أحب أشره على أحد، و أحس إلي يشره إنسان فاضي يحب ينكّد على نفسه و على إلي حوله..
استمتعوا بحياتكم، إلي يقولكم ولهان عليكم قولوله إنتوا ولهانين عليه أكثر.. و إلي يقولكم يحبكم قولوله تحبونه أكثر.. حتى لو طول الغيبة..
حياتنا أقصر من إن نضيعها بشرهة و عتب! :)